Article POLITICS

പെണ്ണുങ്ങള്‍ ഭരിച്ചെന്നാല്‍ പുലരില്ലേ ജനാധിപത്യം?

ജനസംഖ്യയില്‍ പകുതിയിലേറെയും സ്ത്രീകളാണ്. വോട്ടര്‍മാരിലും കൂടുതല്‍ സ്ത്രീകള്‍തന്നെ. നിയമ നിര്‍മാണ സഭകളിലും അധികാര സംവിധാനത്തിലും പക്ഷേ, ഇന്നോളം അര്‍ഹിക്കുന്ന പരിഗണന കിട്ടിയില്ല. ഏറ്റവുമധികം ചൂഷണത്തിനും പീഡനത്തിനും ഇരയാകുന്ന വിഭാഗത്തിന് പുരുഷാധിപത്യ അധികാര ഘടനയെ തലകീഴായ് മറിക്കാനുള്ള ആള്‍ബലമുണ്ട്. ജനാധിപത്യത്തില്‍ അതു വളരെ നിര്‍ണായകമാണ്. വിജയം സാദ്ധ്യവുമാണ്.

ആണ്‍കോയ്മാ വ്യവസ്ഥകളും വഴക്കങ്ങളും പരിഷ്കൃത ജനാധിപത്യ ശീലങ്ങളിലേക്ക് പുതുക്കിപ്പണിയാന്‍ നിയോഗിക്കപ്പെട്ട ഒരു സംഘടിത ശക്തി വേണ്ടവിധം ഉണരാത്തത് എന്തുകൊണ്ടാവും? അര്‍ഹതപ്പെട്ടത് ചോദിച്ചു വാങ്ങാന്‍ ശബ്ദമുയരാത്തതെന്ത്? സ്ത്രീ സംവരണ നിയമം പാര്‍ലമെന്റില്‍ പൊടിപിടിച്ചു കിടപ്പാണ്. ആണ്‍കോയ്മാ ജനാധിപത്യമേ പുരോഗമന രാഷ്ട്രീയ പ്രസ്ഥാനങ്ങളുടെ പോലും അജണ്ടയിലുള്ളു. ‘അവരെക്കാള്‍ കൂടുതല്‍ പേരെ ഞങ്ങള്‍ തെരഞ്ഞെടുപ്പില്‍ മത്സരിപ്പിക്കും’ എന്നല്ലാതെ അമ്പതു ശതമാനം സീറ്റുകളിലെങ്കിലും സ്ത്രീകളെ മത്സരിപ്പിക്കും എന്നു പറയാനോ അതു ചെയ്യാനോ വിപ്ലവ കക്ഷികള്‍ക്കും ശേഷിയില്ല.

ഏറ്റവുമധികം അടിച്ചമര്‍ത്തപ്പെടുന്ന വിഭാഗത്തിന് നീതി ദാനമായി കിട്ടേണ്ടതല്ല. അവകാശമാണ്. ഓരോ പീഡനവാര്‍ത്തയും കേട്ടു ഞെട്ടുന്ന, ഇരകളോടു സഹതപിക്കുന്ന സകലര്‍ക്കും ഈ അധികാര വ്യവസ്ഥയുടെ ആണച്ചുതണ്ടില്‍ മാറ്റം വരുത്താന്‍ ബാദ്ധ്യതയുണ്ട്. അത് ലിംഗാതീതമായ ഒരു ജനാധിപത്യത്തിലേക്ക് ഉയരണമെങ്കില്‍ സ്ത്രീ പ്രാതിനിധ്യം അധികാര വ്യവഹാരങ്ങളുടെ കേന്ദ്രങ്ങളില്‍ പ്രബലമാവണം. തുടക്കം കുറിക്കേണ്ടത് നിയമ നിര്‍മ്മാണ സഭകളില്‍ സ്ത്രീകളും ഭിന്നലിംഗ വിഭാഗങ്ങളും അര്‍ഹമായ ഇടം പിടിച്ചുവാങ്ങിക്കൊണ്ടാവണം.

സ്ത്രീസംഘടനകളേറെയും വിവിധ രാഷ്ട്രീയ കക്ഷികളുടെ കീഴെ പ്രവര്‍ത്തിക്കുന്നവയാണ്. ആണ്‍ജനാധിപത്യ യുക്തികളിലേ അവര്‍ക്കു പ്രവര്‍ത്തിക്കാനാവൂ. അടിച്ചമര്‍ത്തപ്പെടുന്ന ഏറ്റവും വലിയ വിഭാഗത്തിന്റെ അവകാശങ്ങള്‍ ആണധികാരത്തിന് അടിയറ വെക്കുന്നവരാണവര്‍. അവരെ തിരുത്താനും സ്ത്രീയവകാശം പാലിക്കപ്പെടുന്ന ജനാധിപത്യ സുരക്ഷിതത്വം നേടിയെടുക്കാനും വേണ്ട പൊതുസമ്മതം രൂപപ്പെടുത്താന്‍ സ്ത്രീകളായ സാംസ്കാരിക രാഷ്ട്രീയ പ്രവര്‍ത്തകര്‍ക്കും എഴുത്തുകാരികള്‍ക്കും ശ്രമിക്കാവുന്നതാണ്. ദൗര്‍ഭാഗ്യവശാല്‍ അതും കാണുന്നില്ല.

തെരഞ്ഞെടുപ്പില്‍ അഭിമുഖീകരിക്കേണ്ട അത്യന്തം പ്രധാനമായ രാഷ്ട്രീയ പ്രശ്നങ്ങള്‍ ഏറെയുണ്ട്. അവയ്ക്കിടയില്‍ പ്രവേശനം കിട്ടാന്‍ ഇടയില്ലാത്ത ചര്‍ച്ചയാണിത്. എങ്കിലും ഇത് തീരെ അപ്രാധനമല്ല. വരാനിരിക്കുന്ന മാറ്റം പെണ്ണുണര്‍വ്വുമായി ബന്ധപ്പെട്ടാണ് സംഭവിക്കുക എന്നു തീര്‍ച്ച.

ആസാദ്
03 മാര്‍ച്ച് 2021

അഭിപ്രായം എഴുതാം...

Fill in your details below or click an icon to log in:

WordPress.com Logo

You are commenting using your WordPress.com account. Log Out /  മാറ്റുക )

Google photo

You are commenting using your Google account. Log Out /  മാറ്റുക )

Twitter picture

You are commenting using your Twitter account. Log Out /  മാറ്റുക )

Facebook photo

You are commenting using your Facebook account. Log Out /  മാറ്റുക )