Article POLITICS

എവിടെയുമുണ്ട് ട്രമ്പ്, ട്രമ്പന്‍ കൂലിപ്പടയും

അധികാരം അതിന്റെ അന്ധാനുയായികളെ സൃഷ്ടിക്കുന്നു. ആത്മബോധമില്ലാത്ത മൂടുതാങ്ങിയടിമകളെ സൃഷ്ടിക്കുന്നു. അവരെ ചാവേറുകളാക്കുന്നു. ട്രമ്പന്മാരുടെ കാപ്പിറ്റോള്‍ ഇരച്ചുകയറ്റത്തില്‍ ഒരിന്ത്യന്‍ കൊടിയും കണ്ടു എന്നതില്‍ ഞെട്ടേണ്ടതില്ല. മൂടുതാങ്ങി വംശത്തിന് ഒരിടത്തും ജനാധിപത്യം ശീലമല്ല.

ഉള്ളു ചോര്‍ത്തപ്പെടുന്ന പൊള്ളമനുഷ്യരായി, അധികാരത്തിന്റെ ട്രോജന്‍കുതിരകളായി ആധുനിക പൗരസമൂഹത്തിന് മാറാന്‍ കഴിയുന്നത് എങ്ങനെയാണ്? നവോത്ഥാന യുക്തികളും മാനവിക ദര്‍ശനങ്ങളും ഒട്ടും സ്വാധീനിക്കാതെ പോകുന്നതെങ്ങനെ? വംശീയതയുടെയും ഇതര സങ്കുചിത ഞങ്ങള്‍മാത്ര വാദത്തിന്റെയും പതാകകള്‍ ഇത്രമേല്‍ ഉയര്‍ന്നു പറക്കുന്നതെന്ത്?

ട്രമ്പന്‍ താങ്ങിസേനക്ക് അനേകം സമാന പതിപ്പുകളുണ്ട്. ഇലക്ട്രോണിക് മാധ്യമ വലയങ്ങളാല്‍ മെരുക്കപ്പെട്ടവര്‍. നേതൃവീറില്‍ ഊട്ടിവളര്‍ത്തപ്പെട്ടവര്‍. സവര്‍ണ വംശീയ ബിംബങ്ങളാല്‍ നയിക്കപ്പെടുന്നവര്‍. ഞങ്ങള്‍ പറയുന്നതു ശരി, ചെയ്യുന്നതു ധര്‍മ്മം. ഞങ്ങള്‍ സ്പര്‍ശിച്ചാല്‍ ശുദ്ധം. മറ്റാരുടേതും അശുദ്ധം. ഞങ്ങള്‍ക്കൊപ്പമെത്താത്തവര്‍ അസ്പൃശ്യര്‍. അവരുടെ താല്‍പ്പര്യത്തിന് ജനാധിപത്യത്തില്‍ ഇടമില്ല! വംശീയാധികാര സ്വേച്ഛാ വാഴ്ച്ചകളുടെ രാജ്യാന്തര പതിപ്പുകള്‍ പെരുകുന്നു.

ട്രമ്പിനെ തിരിച്ചറിയുമ്പോള്‍ പ്രച്ഛന്ന ട്രമ്പുമാര്‍ തിരിച്ചറിയപ്പെടാതെ പോകാമോ? എത്ര ട്രമ്പു കാണും ഒരു ബോള്‍സനാരോവില്‍? ഒരു നരേന്ദ്ര മോദിയില്‍? മൂടുതാങ്ങി കീടങ്ങളെ പോറ്റി ‘ഞങ്ങള്‍വിശുദ്ധി’ ഓരിയിടുന്ന ഓരോ ഭരണാധികാരിയിലും? ഓരോ ജനാധിപത്യ ശത്രുവിലും? ഞങ്ങള്‍മാത്രവാദത്തിന്റെ ഓരോ കൊടിയടയാളത്തിലും? ജനങ്ങളെ പുറംതള്ളി കെട്ടിപ്പൊക്കുന്ന ഓരോ പുണ്യരാഷ്ട്രത്തിലും?

ഓരോ തലസ്ഥാനത്തും ഓരോ ട്രമ്പുണ്ട്. ട്രമ്പന്‍ കൂലിപ്പടകളുണ്ട്. അവര്‍ പാര്‍ലമെന്റു കയ്യേറി രാജാവിനെ രക്ഷിക്കാന്‍ ശ്രമിക്കും. സെക്രട്ടേറിയറ്റ് കയ്യേറി നാടുവാഴിയെ രക്ഷിക്കാന്‍ ശ്രമിക്കും. അവരുടെ ഭാഷണം ട്രമ്പിന്റേത്. ഭക്ഷണവും ട്രമ്പിന്റേത്. നയിക്കുന്ന യുക്തിയും അണിഞ്ഞ ആയുധവും ട്രമ്പിന്റേത്. പക്ഷെ, അത്യാഹിതം പൊള്ളിക്കും വരെ നാം ഒന്നും അറിയുന്നില്ല.

ആസാദ്
08 ജനുവരി 2021

അഭിപ്രായം എഴുതാം...

Fill in your details below or click an icon to log in:

WordPress.com Logo

You are commenting using your WordPress.com account. Log Out /  മാറ്റുക )

Twitter picture

You are commenting using your Twitter account. Log Out /  മാറ്റുക )

Facebook photo

You are commenting using your Facebook account. Log Out /  മാറ്റുക )