Article POLITICS

അന്നം വിളയിക്കുന്നവര്‍ മോദിസര്‍ക്കാറിനെ മുട്ടുകുത്തിക്കുന്നു

പത്തു ദിവസമായി ഗ്രാമങ്ങളില്‍നിന്നു പുറപ്പെട്ടു പോന്ന കര്‍ഷകര്‍ ശൈത്യകാല മരവിപ്പു തീണ്ടിയ ദില്ലിക്കു ചുറ്റുമുള്ള വഴികളിലും തെരുവുകളിലുമാണ്. തണുപ്പോ വിശപ്പോ അവരെ പിറകോട്ടു വലിക്കുന്നില്ല. ഒറ്റ മുദ്രാവാക്യത്തില്‍, ഒറ്റത്തീര്‍പ്പില്‍ ഉറച്ച ബോദ്ധ്യവും നിവര്‍ന്ന ശിരസ്സുമാണ് ഓരോ കര്‍ഷകന്റേതും. കര്‍ഷകദ്രോഹ നിയമം പിന്‍വലിക്കാതെ അവര്‍ക്കു മടങ്ങാനാവില്ല.

ലോകം ഇപ്പോള്‍ ഇന്ത്യയിലേക്കു തിരിഞ്ഞു നില്‍പ്പാണ്. വിലയില്ലായ്മകൊണ്ടു വിളകള്‍ കത്തിക്കേണ്ടി വന്നവര്‍, പാലും പഴവും പച്ചക്കറികളും സൂക്ഷിക്കാനാവാതെ നശിപ്പിക്കേണ്ടിവന്നവര്‍, കടം കയറി ആത്മഹത്യ ചെയ്തവരുടെ ബന്ധുക്കള്‍, അതിര്‍ത്തിയിലും നഗരങ്ങളിലും രാജ്യത്തെ കാത്തുപോരുന്നവരുടെ കുടുംബങ്ങള്‍ – അവരെങ്ങനെ അതിജീവിക്കുന്നുവെന്ന്, എങ്ങനെ ഭരണകൂടത്തെ തീക്കനലില്‍ പൊള്ളിക്കുന്നുവെന്ന് ലോകമാദ്ധ്യമങ്ങള്‍ വിസ്മയപൂര്‍വ്വം കാണുന്നു.

ലോക നേതാക്കള്‍ കര്‍ഷകരോട് ഐക്യപ്പെട്ടു തുടങ്ങുന്നു. തൊഴിലാളികളുടെയും കര്‍ഷകരുടെയും സംഘങ്ങള്‍ തെരുവുകളില്‍ ഇന്ത്യന്‍ കര്‍ഷകര്‍ക്ക് ഐക്യദാര്‍ഢ്യം പ്രഖ്യാപിക്കുന്നു. കര്‍ഷകരില്ലെങ്കില്‍ ലോകമില്ലെന്ന് അവര്‍ മുന്നറിയിപ്പു നല്‍കുന്നു. ന്യൂയോര്‍ക്ക് ടൈംസ് എഴുതിയത് മോദി സര്‍ക്കാറിന് കടുത്ത വെല്ലുവിളിയുയരുന്നു എന്നാണ്. സമാനതകളില്ലാത്ത സമരമെന്ന് ബി ബി സി. രാഷ്ട്രീയ നേതൃത്വങ്ങളെ ജീവല്‍ പ്രശ്നങ്ങളിലേക്ക് വലിച്ചടുപ്പിച്ച ഉജ്വല സമരമെന്നും ബി ബി സി വിശേഷിപ്പിക്കുന്നു.

ഇന്ത്യന്‍ ജനസംഖ്യയുടെ പാതിയിലേറെയും കൃഷി ഉപജീവനവൃത്തിയാക്കിയവരാണ്. അവരില്‍ എഴുപതു ശതമാനവും ഒന്നോ രണ്ടോ ഏക്കറില്‍ താഴെ മാത്രം ഭൂമിയുള്ള കര്‍ഷകരും ഭൂരഹിത കര്‍ഷകരുമാണ്. അവരുടെ അദ്ധ്വാനവും ജീവിതവും കോര്‍പറേറ്റ് വിപണിയുടെ ഹിംസാത്മക ചാഞ്ചാട്ടങ്ങള്‍ക്ക് എറിഞ്ഞു കൊടുക്കുകയാണ് കേന്ദ്ര സര്‍ക്കാര്‍ പുതിയ നിയമ നിര്‍മ്മാണത്തിലൂടെ ചെയ്തത്. ആ നിയമം പിന്‍വലിക്കാതെ കര്‍ഷകര്‍ക്ക് ഉറങ്ങാനാവില്ല. വിജയിക്കാതെ ഈ സമരം അവസാനിപ്പിക്കാനോ ദില്ലിയില്‍നിന്നു തിരിച്ചു പോകാനോ ആവില്ല. ലോകം ഇക്കാര്യം ഓരോ ഭാഷയിലെ മാദ്ധ്യമങ്ങളിലും എഴുതിവെക്കുന്നു.

രാഷ്ട്രീയ പാര്‍ട്ടികള്‍ അവരുടെ അജണ്ടയ്ക്കും കഴിവിനും വിധേയമായി കര്‍ഷക സമരങ്ങള്‍ നടത്തുന്നതേ ഇന്നോളം നാം കണ്ടിട്ടുള്ളു. ഇപ്പോഴാവട്ടെ ജീവിതം വഴിമുട്ടിയ കര്‍ഷകര്‍ വിജയമോ മരണമോ ഏറ്റുവാങ്ങാന്‍ ഇറങ്ങിപ്പുറപ്പെട്ടിരിക്കുന്നു. രാഷ്ട്രീയ പാര്‍ട്ടികള്‍ അവര്‍ക്കൊപ്പം ഓടിയെത്തുകയാണ്. സമര അജണ്ട കര്‍ഷകരുടേതാണ്. വഴി സഹനത്തിന്റെയും സഹിഷ്ണുതയുടേതുമാണ്. ലാത്തികളോ തോക്കുകളോ ജലപീരങ്കികളോ ഭരണകൂട ഭീഷണികളോ കാലാവസ്ഥാ മാറ്റമോ അവരെ ക്ഷീണിപ്പിക്കുന്നില്ല. ആറുമാസംവരെ ഇങ്ങനെത്തന്നെ നിലനില്‍ക്കാന്‍ ഞങ്ങള്‍ക്കു കഴിയുമെന്ന് അവര്‍ പറയുന്നു. ഭരണകൂടത്തിനു പക്ഷെ, ആ മഹാശക്തിക്കു മുന്നില്‍ ദിവസങ്ങളോളം പോലും പിടിച്ചു നില്‍ക്കാനായെന്നു വരില്ല.

കര്‍ഷകര്‍ക്കു വേണ്ടാത്ത നിയമം അവരുടെ ക്ഷേമത്തിനെന്ന പേരില്‍ അടിച്ചേല്‍പ്പിക്കാന്‍ സര്‍ക്കാറിന് എന്ത് അധികാരമാണുള്ളത്? കര്‍ഷകര്‍ ഒറ്റ ശബ്ദത്തില്‍ ആവശ്യപ്പെടുന്നത് സര്‍ക്കാര്‍ ചര്‍ച്ചകൂടാതെ ഏകപക്ഷീയമായി പാസാക്കിയ കോര്‍പറേറ്റ് സൗഹൃദ നിയമങ്ങള്‍ ഉടന്‍ പിന്‍വലിക്കണമെന്നാണ്. അതില്‍ കവിഞ്ഞതോ കുറഞ്ഞതോ ആയ ഒരു തീര്‍പ്പിലും ഈ പ്രക്ഷോഭം ഒപ്പുവെച്ചു പിരിയില്ല. സ്വാതന്ത്ര്യാനന്തര ഇന്ത്യയിലെ ഏറ്റവും ഉജ്വലമായ പ്രക്ഷോഭമാണ് ഇപ്പോള്‍ നടക്കുന്നത്. നരേന്ദ്രമോദി സര്‍ക്കാറിനെ അധികാരത്തിലേറ്റിയ ശക്തി തന്നെയാണ് ജീവല്‍പ്രശ്നത്തിന്റെ ചൂളയില്‍ ആ സര്‍ക്കാറിനെ വേവിക്കുന്നത്. രാജ്യത്തിന്റെ ഭാവി നിര്‍ണയിക്കാന്‍ ശേഷിയുള്ള ഉണര്‍വ്വാണ് ദൃശ്യമാകുന്നത്. കൃഷിഭൂമിയുടെ രാഷ്ട്രീയം ഇന്ത്യയാകെ പടരുകയാണ്. നമുക്കും വിട്ടു നില്‍ക്കാനാവില്ല.

ആസാദ്
05 ഡിസംബര്‍ 2020

അഭിപ്രായം എഴുതാം...

Fill in your details below or click an icon to log in:

WordPress.com Logo

You are commenting using your WordPress.com account. Log Out /  മാറ്റുക )

Google photo

You are commenting using your Google account. Log Out /  മാറ്റുക )

Twitter picture

You are commenting using your Twitter account. Log Out /  മാറ്റുക )

Facebook photo

You are commenting using your Facebook account. Log Out /  മാറ്റുക )