Article POLITICS

ഹത്രാസില്‍നിന്നു മടങ്ങുന്നവരേ, വാളയാറിലേയ്ക്കു വരൂ

വാളയാറും ഹത്രാസും തമ്മിലെന്ത് താരതമ്യം എന്നു ചോദിക്കുന്നതു കേട്ടു. ശരിയാണ്, അത് ആലോചിക്കേണ്ടതു തന്നെ. എന്തൊക്കെ സമാനതകള്‍, എന്തൊക്കെ അപൂര്‍വ്വതകള്‍ എന്നു വേര്‍പെടുത്തി കാണണം.

രണ്ടിടത്തും ദളിത് പെണ്‍കുട്ടികളാണ് ഇരകള്‍. അവര്‍ അതിക്രൂരമായി ബലാല്‍സംഗം ചെയ്യപ്പെടുകയും കൊല്ലപ്പെടുകയും ചെയ്തു. രണ്ടിടത്തും പൊലീസ് പ്രതികളെ രക്ഷിക്കാന്‍ ശ്രമിച്ചു. കേസ് ദുര്‍ബ്ബലപ്പെടുത്താന്‍ നോക്കി. കടുത്ത പ്രതിഷേധത്തിന് ഇടവരുത്തി. സര്‍ക്കാര്‍ രണ്ടിടത്തും പൊലീസിനു തണലായി.

ഹത്രാസില്‍ പത്തൊമ്പതു വയസ്സായ ഒരു പെണ്‍കുട്ടിയാണ് കൂട്ടബലാല്‍സംഗത്തിന് ഇരയായത്. ശരീരം തകര്‍ന്നു. മരണാസന്നയായപ്പോഴാണ് വിട്ടത്. പതിനാലു ദിവസം ആശുപത്രിയില്‍ കിടന്നു. താന്‍ ബലാല്‍സംഗം ചെയ്യപ്പെട്ടുവെന്ന് അവരുടെ അന്ത്യമൊഴി പൊലീസ് രേഖപ്പെടുത്തിയതാണ്. പക്ഷെ പൊലീസിനു സംശയം തീരുന്നില്ല. പോസ്റ്റ്മോര്‍ട്ടം ചെയ്തപ്പോള്‍ ശരീരത്തില്‍ ബീജത്തിന്റെ അംശം കണ്ടില്ലെന്നാണ് പൊലീസ് മേധാവി പറഞ്ഞത്. നിയമവിരുദ്ധ പ്രസ്താവനയാണ് അത്. ബലാല്‍സംഗം നടന്നാല്‍ ബീജം കാണണമെന്ന് ശഠിക്കാനാവില്ല. അക്കാര്യം അറിഞ്ഞിട്ടും പൊലീസ് വാസ്തവം വളച്ചൊടിച്ചു. മകള്‍ പറഞ്ഞത് ആവര്‍ത്തിക്കുന്ന കുടുംബത്തെ നുണപരിശോധന നടത്തണമെന്നുവരെ പൊലീസ് പറഞ്ഞുകളഞ്ഞു!

പോസ്റ്റുമോര്‍ട്ടത്തിനു ശേഷം ശരീരം വീട്ടുകാര്‍ക്ക് വിട്ടു കൊടുത്തില്ല. ജീവനറ്റ ശരീരത്തോടു കാണിക്കേണ്ട ആദരവു കാണിച്ചില്ല. ഒരു തെളിവും ബാക്കി നില്‍ക്കാത്തവിധം രാത്രിതന്നെ ഉന്നത ഉദ്യോഗസ്ഥരുടെ താല്‍പ്പര്യപ്രകാരം പൊലീസ് ശവം കത്തിച്ചുതീര്‍ത്തു. കുടുംബത്തിന്റെ ആഗ്രഹം മാനിക്കപ്പെട്ടില്ല. മാത്രമല്ല വീട്ടുകാരെ മുഴുവന്‍ വീട്ടുതടങ്കലിലാക്കി. ആരോടും മിണ്ടരുതെന്ന് ആജ്ഞ നല്‍കി. മൊബൈല്‍ ഫോണുകള്‍ പിടിച്ചുവെച്ചു. ആ പ്രദേശത്തേക്ക് മാധ്യമ പ്രവര്‍ത്തകരെയോ പൊതു പ്രവര്‍ത്തകരെയോ പ്രവേശിപ്പിച്ചില്ല. കേസില്‍നിന്നു പിന്മാറാന്‍ അഥവാ മൊഴി മാറ്റാന്‍ കുടുംബത്തെ നിര്‍ബന്ധിക്കുകയോ ഭീഷണിപ്പെടുത്തുകയോ ചെയ്യുന്ന അവസ്ഥയുണ്ടായി.

വാളയാറില്‍ ആഴ്ച്ചകളുടെ ഇടവേളയില്‍ ഒമ്പതു പതിമൂന്നും വയസ്സുള്ള രണ്ടു പെണ്‍കുട്ടികളാണ് ബലാല്‍സംഗത്തിന് ഇരയായി കെട്ടിത്തൂക്കപ്പെട്ടത്. പോസ്റ്റ്മോര്‍ട്ടം റിപ്പോര്‍ട്ട് വായിച്ചവര്‍ക്ക് സംഭവിച്ചതിന്റെ ഭീകരതയറിയാം. ഒമ്പതും പതിമൂന്നുംമാത്രം വയസ്സുള്ള കുട്ടികളുടെ കുത്തിക്കീറിയ മലദ്വാരത്തിന്റെ ദയനീയ ദൃശ്യം ഡോക്ടര്‍ രേഖപ്പെടുത്തിയിട്ടുണ്ട്. പൊലീസിന് ഇതില്‍ ഒരു ഞെട്ടലും കണ്ടില്ല. പോക്സോ ചുമത്തേണ്ട കേസാണ്. ജാമ്യം കിട്ടാന്‍ പ്രയാസമുള്ള കേസ്. പ്രതികളെ ജാമ്യത്തിലിറക്കാന്‍ പൊലീസിന്റെയും സഹായമുണ്ടായി. കുട്ടികളുടെ സമ്മതത്തോടെയാവും ബലാല്‍ക്കാരം എന്നു പൊലീസ് ഏമാന്‍ പത്രക്കാരോടു പറഞ്ഞു!

ഒമ്പതും പതിമൂന്നും വയസ്സുള്ള കുട്ടികളുടെ സമ്മതം! ഈ പൊലീസ് ഏമാന് തലയ്ക്കു വെളിവില്ലേ? ആ ഒരൊറ്റ പരാമര്‍ശത്തിന് അയാളുടെ പേരില്‍ പോക്സോ വകുപ്പു ചുമത്തി കേസെടുക്കേണ്ടതാണ്. എന്നാല്‍ എസ് പിയായി പ്രമോഷന്‍ കൊടുത്തു സര്‍ക്കാര്‍! വിദഗ്ദ്ധ സേവനത്തിന് ഐ പി എസ് നല്‍കാന്‍ ശുപാര്‍ശ ചെയ്യാനും മറന്നില്ല. വാളയാറിലെ കൊച്ചു പെണ്‍കുട്ടികളുടെ നിലവിളി സര്‍ക്കാറിന്റെ ആഭ്യന്തര വകുപ്പു കേട്ടില്ല.

രണ്ടു കുട്ടികളുടെ ശവശരീരവും കത്തിച്ചു കളയാന്‍ പൊലീസ് കാണിച്ച തിടുക്കത്തെപ്പറ്റി അമ്മയ്ക്കു പരാതിയുണ്ട്. തങ്ങളുടെ ഇത്തിരി ഭൂമിയിലോ കുടുംബശ്മശാനത്തിലോ മറ ചെയ്യാനുള്ള അവകാശം നിഷേധിക്കപ്പെട്ടു. പൊതുശ്മശാനത്തില്‍ കത്തിച്ചു കളയുംവരെ പൊലീസിന് സ്വാസ്ഥ്യമുണ്ടായില്ല. ദളിതര്‍ മരിച്ചാല്‍ കത്തിച്ചേ മതിയാവൂ എന്ന് എങ്ങുമുള്ള പൊലീസുകാര്‍ക്ക് നിശ്ചയമുണ്ട്. ദളിതര്‍ക്കു നിയമത്തിന്റെ പരിരക്ഷ ലഭിക്കാവുന്ന സാഹചര്യങ്ങളെക്കൂടി ചാരമാക്കിക്കൊണ്ടാണ് പ്രച്ഛന്ന ഹിന്ദുത്വം ഭരണകൂട ഉപശാലകളില്‍ പ്രവര്‍ത്തിച്ചു പോരുന്നത്. അതിന് യു പിയെന്നോ കേരളമെന്നോ ഭേദമില്ലെന്നാണ് അനുഭവങ്ങള്‍ തെളിവേകുന്നത്.

പോക്സോ കേസുകളില്‍ പ്രതികള്‍ക്കു വേണ്ടി ഹാജരാവുന്ന വക്കീല്‍ കുട്ടികളുടെ അവകാശങ്ങള്‍ക്കു വേണ്ടിയുള്ള സമിതിയുടെ ജില്ലാ ചെയര്‍മാനായി. വിദഗ്ദ്ധ പാനല്‍ തയ്യാറാക്കാനുള്ള സര്‍ക്കാറിന്റെ വൈഭവം ഒന്നു വേറെയാണ്. വാളയാറിലെ പെണ്‍കുട്ടികളുടെ നിലവിളി കേള്‍ക്കില്ല എന്ന വാശിയിലായിരുന്നു സര്‍ക്കാര്‍. കേസു വിസ്താരം കഴിഞ്ഞു കോടതി ലജ്ജിച്ച നേരമുണ്ടായി. ഒരു കേസ് ഇതില്‍ക്കൂടുതല്‍ ദുര്‍ബ്ബലമാക്കുന്നതെങ്ങനെ എന്നു കോടതി അന്തംവിട്ടുനിന്നു!. പ്രോസിക്യൂഷന്റെ പരാജയമെന്ന് നീതിബോധത്തിനേറ്റ കനത്ത ആഘാതത്തെ കോടതി ലളിതമായി കുറിച്ചു.

വാളയാറിലെ കരള്‍ പറിഞ്ഞുപോയ അമ്മ നീതിതേടി അലഞ്ഞുകൊണ്ടേയിരിക്കുന്നു. മുഖ്യമന്ത്രിയുടെ കാലു പിടിച്ചാണ് അവര്‍ നിവേദനം സമര്‍പ്പിച്ചത്. ഈ കോവിഡ് രോഗ കാലത്തും അവര്‍ പൊള്ളുന്ന കാലുകളുമായി ഓടുകയാണ്. നാളെയും മറ്റന്നാളും അവര്‍ തിരുവനന്തപുരത്തുണ്ട്. നീതിയില്‍ കുറഞ്ഞ ഒന്നും അവരെ തൃപ്തിപ്പെടുത്തില്ല.

ഹത്രാസുപോലെയല്ല വാളയാര്‍ എന്നു പ്രബന്ധമെഴുതുന്നവര്‍ അതു തുടരട്ടെ. ബി ജെ പി പോലുള്ള തീവ്ര വലതുപക്ഷ പ്രസ്ഥാനം ഭരിക്കുന്ന നാട്ടില്‍ ദളിതനു രക്ഷ കാണില്ല. അവരുടെ ജാതിഹിന്ദുത്വ ദര്‍ശനം ദളിതരെ പുറത്തു നിര്‍ത്തും. ഉന്മൂലനം ചെയ്യും. മനുവിന്റെ പുസ്തകത്തില്‍ ദളിതര്‍ മനുഷ്യരല്ല. യുപിയില്‍ യോഗിയുടെ നിയമപുസ്തകം മനുവാണ്. ദിനംപ്രതി ദളിതര്‍ വേട്ടയാടപ്പെടുന്ന വാര്‍ത്തകള്‍ വരുന്നു. ഫാഷിസത്തിന്റെ ഈ തേരോട്ടത്തെ തടഞ്ഞു നിര്‍ത്തേണ്ട പ്രത്യയശാസ്ത്രങ്ങള്‍ പക്ഷേ, അതേവഴി പോകുകയോ എന്ന് വാളയാറില്‍ കൊല്ലപ്പെട്ടവരുടെ ബന്ധുക്കള്‍ ചോദിക്കുന്നു.

ഹത്രാസും വാളയാറും തമ്മില്‍ എന്തെന്തു വ്യത്യാസമെന്ന് ഇനി നേരമുള്ളവര്‍ വാദിക്കട്ടെ. ദളിതരുടെ രക്തത്തിനും സഹനത്തിനും എന്തു രുചിഭേദമാണ് വടക്കും തെക്കുമെന്ന് പറയട്ടെ. പെണ്‍കുട്ടികള്‍ പിച്ചിച്ചീന്തപ്പെടുകയും കൊന്നു കത്തിക്കുകയും ചെയ്തത് ആരൊക്കെയാണ്? ആരാരു ചെയ്താല്‍ അതു നീതിയാവും? കളങ്കത്തെ ഏതു കൊടികൊണ്ടു പുതപ്പിച്ചാല്‍ പവിത്രമാകും?

ഫാഷിസ്റ്റുകളുടെ ചോരക്കൊതിയോളം വരില്ല ഞങ്ങളുടെ കൈപ്പിഴയെന്നു പറഞ്ഞാല്‍ അതു വാസ്തവമാവാം. എന്നാല്‍ പറ്റിയത് ഏറ്റു പറഞ്ഞു തിരുത്താനും വാളയാറിലെ പെണ്‍കുട്ടികളുടെ അമ്മ നയിക്കുന്ന പോരാട്ടത്തില്‍ പങ്കു ചേരാനും കഴിയണം. അവര്‍ക്കു നീതി ലഭ്യമാക്കാന്‍ സാധിക്കണം. ഇല്ലെങ്കില്‍ നിങ്ങളും സംഘപരിവാരങ്ങളും തമ്മില്‍ എന്തു വ്യത്യാസം? യോഗിയും പിണറായിയും തമ്മില്‍ പിരിയുന്നിടം ഹത്രാസ് -വാളയാര്‍ ഭൂപടങ്ങള്‍ വെച്ച് അടയാളപ്പെടുത്താന്‍ ശ്രമിക്കുന്നതു കൊണ്ട് എന്തു കാര്യം സഖാക്കളേ? യോഗി നല്‍കാത്ത നീതി ഞങ്ങള്‍ നല്‍കുമെന്ന് ഒന്ന് ഉറപ്പിച്ചു പറയാമോ? ആ ആര്‍ജ്ജവമാണ് കാണേണ്ടത്.

ആസാദ്
07 ഒക്ടോബര്‍ 2020

അഭിപ്രായം എഴുതാം...

Fill in your details below or click an icon to log in:

WordPress.com Logo

You are commenting using your WordPress.com account. Log Out /  മാറ്റുക )

Google photo

You are commenting using your Google account. Log Out /  മാറ്റുക )

Twitter picture

You are commenting using your Twitter account. Log Out /  മാറ്റുക )

Facebook photo

You are commenting using your Facebook account. Log Out /  മാറ്റുക )